أنا المواطن .. ابن المواطــن ..
أبو المواطــن ..
طفــران ..
جالس مطنن سهــران ..
مخدر واصل مخــزن ..
قد جاب لي القات الجنــان ..

...

دائماً حيــران ..
في هذه البلــدان ..
قلنا للنظام شعبك يتهــان ..
النظام الي كلهم حمــران ..
حمران العيــون ..
والعنــوان ..

فارحل قبل فوات الآوان ..
قالوها كلهم مابقى انســان ..
رحلك واهرب بالطيــران ..
لاكن جلست مواصل في العصيــان ..
تلعن هاذك وتأمر فــلان ..
وجريدة وتلفزيون وخطابات هذيــان ..
ومادام عادهم مسيطرين الخــلان ..
فانت عادك في الوطــن ..
كانك السلطــان ..

...

مسكين هذا الشعب الحيــران ..
الي صدق ومشي وراء الخرفــان ..
حتى الخرفان طلعوا من الحمــران ..
من حاشد ومن سنحــان ..
خرفان حاشد كلهم في البرلمــان ..
وخرفان سنحــان ..

في ايديهم الجيش كله بدون اي نقصــان ..
أموالهم ذهب ولؤلؤء ومرجــان ..
ادمنوا على نهب الاوطــان ..
والبسط على الاراضي والميــدان ..
على اراضي المواطــن ..
الغلبــان

لاهم بطلو الحلفــان ..
ولا المواطن بطل يهتــان ..
فقير كحيــان ..

...

قالو له معك حــلان ..
اسلك أحد الطريقــان ..
طريق الثورة بقيادة سارقــان ..
ان فشلت ضاع حقك وعليك بالنسيــان ..
وان نجحت يستمر السرقه وانت فرحــان ..
ومن مسك النظام هم اثنــان ..

النظام السابق التعبــان ..
والنظام المعارض الفرحــان ..
يشتوا يرجعوا الوطن افغانستــان ..
وحرب السعودية مع ايــران ..
ااااااح بس قد ضحك علينا الانس والجــان ..

او الطريق الاخر وهو ضمان ..
ترتاح في الدنيا وتنام شبعان ..
تكون من السرق واصدقاء الشيطان ..
وعقباك شديد عن ربك والله المستعان ..

...

خلاص بس يكفي هذيــان ..
قلمي قد خلص حبره من زمــان ..
والكهرباء طافية من قبل ساعتــان ..
والمولد قدو بيطلع دخــان ..
شغال واصل مسكين تعبــان ..
وانا الصدق قدني نعسان ..
أروح ارقد لي يكفي جنان ..

...

تصبحون على خير يا من تبحثون عن الأوطان ..
في صفحات الجرائد والفيسبوك ومجالس الخزان ..

تصبحون على خير يا من تلعنون الامريكان ..
تصبحون على خير يا سكان منطقة عيبان ..
الي اخذتها علينا السعودية مع جيزان ..

تصبحون على خير يا بقايا السلطان ..
تصبحون على خير يا من تصرخون في وجه من سرق ثورة الشجعــان ..
تصبحون على خير يا من تسعون الى عدم تقسيم الوطن إلى يمنــان ..
تصبحون على خير ونحن على وشك دخول شهر رمضــان ..
تصبحون على خير وانتبهو يضحك عليكم الشيطــان ..
تصبحون على خير يا من تبحثون في الارجاء عن الحنــان ..
تصبحون على خير يا من يسهرون الليالي في الحرمــان ..
تصبحون على خير يا من تقارنوني بصفات فلان وعــلان ..
تصبحون على خير يا من يقراء كلماتي وهو زعــلان ..
تصبحون على خير فقلبي لا يقبل القسمة لاثنــان ..
تصبحون على خير يا من اساءتم إليا فانا من هواة النسيــان ..
تصبحون على خير يا أصدقائي وأحبائي واولاد الجيــران ..